會安:hea 遊好地方 ,這裡有古城有夜市， 可以影相， 行街，買野同食野。
呢度我玩左5日4 夜， 極少遇到強國人， 最多遇到的是韓國自由行。途經硯港見到嗰邊有好多豪華賭場酒店同埋強國字店舖， 相信硯港嗰邊應該會多啲強國人。這裡亦有不少越南人黎旅遊。夜市有餐廳，酒吧， 按摩店， 唔覺有色情事業。
會安呢邊我地4 晚都住喺river town hotel, 由硯港機場一個鐘車程到酒店， 酒店接送 18USD/車。
呢間酒店大部份房間望河景，有露台， 乾淨。有兩個泳池， 一深（1.1-1.9m）一淺， 提供水泡同救生衣， 小朋友嬉水又得， 大人游水又得。
酒店包早餐， 都好ok 架， 有沙律菜，有飯， 有麵， 有飽，芝士， 腸， 即煎蛋， 即煮越南粉，唔同味嘅乳酪……。一定夠飽。 酒店餐廳食物水準都o幾好架， 香港普通餐廳價錢。有時遇著狂風暴雨未能出街搵食， 留係度食都ok 架。
 |
| 酒店餐廳的牛肉湯, 生牛肉和湯是分開端上, 牛肉清湯是用花茶壺跟蠟燭上, 份量超多 |
 |
| 煎魚飯 |
職員又有禮貌， 服務又好， 大堂下層又有shower room（有沖涼液同洗頭水供應）, 下午12 點checked out 完， 行完街返黎， 成身汗， 沖個涼， 換埋衫先上車去機場， 勁正。
酒店位置可以步行到夜市同古城(大概10 min )， 唔想行嘅都有免費接駁車到古城及沙灘(An Band beach & Hidden beach )。
An Bang 沙灘海水超清，沙幼， 水淺， 浪有點大， 有免費清水沖身。有很多餐廳。
交通篇
這裡有很多酒店都有免費單車供應， 但這裡的路況是古城及夜市都很細， 步行已可以走看完， 這裡人多，電單車多，人力車多， 踏單車並不是悠閑寫意， 泊車也不是易事。往沙灘的路要沿大馬路走， 大型車多， 會有點危險。
 |
| 夜市 |
食野篇
會安食野價錢又平又好味。街市， 夜市， 餐廳都有好多選擇， 受不了街邊野都唔怕， 夜市裡有一似food court 嘅餐廳有齊所有街頭小食。有兩層， 極多座位。係街邊或街市入面食野， 衛生程度都ok 喎。我食完都冇事喎。景點內的遊客餐廳都係平過香港餐廳價格。
 |
| 街市 |
一碗牛肉河粉大概25k-50kVND（20k~1USD），當然份量是超少，但可以食多幾樣唔同嘅野， 唔駛一碗粉就k.o. 你， 之後就飽到食唔到其他野。牛肉：不要有祈望。碗粉嘅重點係個湯，好好飲。
雞肉湯河： 夜市內某店， 見有越南人食，便入去食， 中伏， 個湯勁唔得， 好似味精湯……
高樓麵：會安獨有嘅撈麵，都好食。還有其他撈粉。
 |
| 高樓麵 |
 |
| 夜市餐廳的燒豬肉撈粉 |
 |
| 會安的豬肉都是乾柴的 |
white rose： 其實係一塊河粉皮包1住一點肉嘅雲吞， 好味。端上時會加有甜醋, 炸蔥頭/蒜
街邊仲有一些透明蝦餃皮包住一點肉嘅餃, 好食。
 |
| ? 好好味水晶餃 鄰檔: 糖水檔 |
扎肉：呢度食到嘅扎肉係用好多層葉包住， 塊肉好細同薄， 但超彈牙， 好好味啊。好懷念。。。
越式法包一定要試， 大概20k-50kVND , 視乎餡料。
 |
| 呢件多料啲, 貴啲 50K VND |
即煎香蕉餅， 都好味。
 |
| 炸: 冬甩,蝦餅, 香蕉餅, 餡餅 |
越式煎/燒薄餅： 薄米紙上有蝦米， 蔥……。幾香幾好味。
雞飯： 30kVND, 細細碟， 都ok。
街邊仲有好多檔豆腐花加涼粉嘅糖水檔， 好多人幫襯架， 不過我就冇試過。
 |
| ice coffee with tea |
 |
| 河邊粉檔 |
我呢段時間黎， 早上就曬到傻， 下午就落雨或雷雨， 夜晚通常都停雨或驟雨。下午通常都留守酒店泳池消暑消暑。
仲有入古城唔需要門票， 只有參觀古城內的景點，例如會館， 古宅先要出示門票。我地全程冇參觀過呢啲景點， 所以冇買過門票。為左避免被有關職員追買門票， 我地都避免喺古城主要出入口出入。
唔駛追趕景點， 隨意行下食下睇下，浸下泳池。會安係唔錯嘅選擇。
不過香港做越南簽證費不便宜
